Elevane ved kulturskulen fekk nok ein gong synt fram kor mange eineståande flinke born og unge, som bur i denne lille kommunen vår. Det som også var kjekt å registrere, var den store variasjonen på innslaga. Vi fekk oppleve elevar i aksjon med mellom anna både gitar, klarinett, messinghorn, fiolin, song, tverrfløyte og slagverk.
Kulturskuleavslutninga starta kl 18.00 og sjølv utan pause, vart klokka faktisk over åtte før alle hadde framført innslaga sine. Med berre eitt innslag frå kvar av dei (enkelte deltok rett nok med fleire instrument), skjønar ein fort kor stor breidde det var på avslutninga. Dei to timane gjekk faktisk rett så fort, med så mykje flott å få oppleve og både lærarar og elevar hausta mang ein trampeklapp for det dei har fått til i løpet av skuleåret.
Kulturskulerektor, Bjørnar Midtbust, kunne avslutningsvis fortelje at det til neste år faktisk var endå større interesse for å vere med i kulturskulen og han var veldig glad for at alle dei dyktige lærarane har sagt frå at dei stiller på. Heile 70 elevplassar, fordelt på 60 elevar vert status for kulturskulen, neste skuleår og i Stordal får alle som ynskjer det plass!
Bjørnar nemnte også at kulturskulen ville samarbeide nærare med Stordal Musikkverksted det komande skuleåret og syntest det var veldig positivt at ungdomane Åge Staurset og Adrian Hoff har teke tak i å skape ny giv der.
I tillegg til å takke elevar og lærarar ved kulturskulen, nytta ein stolt og imponert rektor også høve til å takke Mass Peter Jelle og Jarle Helgesen. Det var desse to som tok hand om det tekniske, denne kvelden.
På vegne av alle oss som fekk slik ei flott oppleving i Stordalshallen i går kveld, er det på sin plass å rette ei stor takk til Stordal kulturskule!
I Stordalshallen sitt bildegalleri finn du no 40 bilder frå den fine kulturskuleavslutninga.
Sjå gjerne også reportasjar frå tidlegare års kulturskuleavslutningar.
Kulturskuleavslutning 2011
Kulturskuleavslutning 2010
Kulturskuleavslutning 2009